رباعيات صلاح جاهين

أنا شاب لكن عمري ألف عام


وحيد لكن بين ضلوعي زحام


خايف و لكن خوفي مني أنا

أخرس و لكن قلبي مليان كلام


عجبي !!!!




يا باب يا مقفول ... إمتي الدخول

صبرت ياما و اللي يصبر ينول


دقيت سنين ... و الرد يرجع لي : مين ؟

لو كنت عارف مين أنا كنت أقول


عجبي !!!
خرج ابن ادم من العدم وقلت : يااه
رجع ابن ادم للعدم وقلت : يااه
تراب بيحيا ... وحى بيصير تراب
الاصل هو الموت ولا الحياة
وعجبى !!!!




عجبتني كلمة من كلام الورق


النور شرق من بين حروفها و برق


حبيت أشيلها ف قلبي .. قالت حرام


ده أنا كل قلب دخلت فيه اتحرق



وعجبى !!!!





ليه يا حبيبتي ما بيننا دايما سفر



ده البعد ذنب كبير لا يغتفر


ليه يا حبيبتي ما بيننا دايما بحور


أعدي بحر ألاقي غيره اتحفر

عجبى!!!!



سهير ليالي و ياما لفيت و طفت


و ف ليه راجع في الضلام قمت شفت


الخوف ... كأنه كلب سد الطريق



و كنت عاوز أقتله .. بس خفت


وعجبى !!!!





علي رجلي دم .. نظرت له ما احتملت


علي إيدي دم.. سألت ليه ؟ لم وصلت

علي كتفي دم.. و حتي علي رأسي دم



أنا كلي دم .. قتلت ؟ ..... والا اتقتلت



وعجبى!!!



أعرف عيون هي الجمال و الحسن

واعرف عيون تاخد القلوب بالحضن


و عيون مخيفة و قاسية وعيون كتير

وباحس فيهم كلهم بالحزن



وعجبى !!!!


إيش تطلبي يا نفس فوق كل ده

حظك بيضحك و انتي متنكده


ردت قالت لي النفس : قول للبشر



ما يبصوليش بعيون حزينة كده



وعجبى !!!!!


في يوم صحيت شاعر براحة و صفا



الهم زال و الحزن راح و اختفي


خدني العجب و سألت روحي سؤال



أنا مت ؟ و لا وصلت للفلسفة

عجبي !!!



يا حزين يا قمقم تحت بحر الضياع


حزين أنا زيك و إيه مستطاع


الحزن ما بقالهوش جلال يا جدع



الحزن زي البرد ... زي الصداع

وعجبى !!!!



انتظروا الجزء الثانى

تحياتى :- رينادا